1 A Jezus, kiej uwidzioł kupa ludzi, to wloz na gore a kiej siod, prziszli ku Niymu ci, kierych uczył
2 Wtynczas odewrził gymbe a uczył jich:
3 Błogosławiyni hudobni w duchu, bo ich je królestwo niebieski
4 Błogosławiyni, kierzi sie szkrybióm, bo óni bydóm pocieszyni
5 Błogosławiyni ćmiyle, bo óni dostanóm ziymie
6 Błogosławiyni, kierzi fest chcóm sprawiedliwości, bo óni bydóm nafilowani
7 Błogosławiyni, kierzi pómogajóm inkszym, bo óni też bydóm mieć pómoc
8 Błogosławiyni, kierzi majóm czyste serce, bo óni uwidzóm Pónbóczka
9 Błogosławiyni, kierzi robióm pokój, bo na nich sie bydzie prawić że sóm synkami od Pónbóczka
10 Błogosławiyni, kierzi wystojóm skyrs sprawiedliwości, bo ich je królestwo niebieski
11 Błogosławiyni żeście sóm, kiej skyrs mie bydóm wóm szpatnie rzóndzić, sekirować was a cyganić we wszeckim, co je złe, prociw wóm
12 Bydźcie radzi a wiesieli, bo wasza nagroda w niebie je wielkucno; tak sekirowali proroków, kierzi byli przed wami
13 Wyście sóm sól ziymi; ale kiej na sól przidzie luft, to czym jóm posolóm? Uż bydzie na nic, yny na wyciepani a coby jóm ludzie podrepsili
14 Wyście sóm tym, co świyci na świecie. Miasto, co je na gorze nie poradzi sie schować
15 Nie rożygo sie świyczki a nie dowo sie ji pod garniec, ale na świycznik a świyci wszeckim, kierzi sóm dóma
16 Tóż niech wasze światło świyci przed ludziami, coby widzieli to, co robicie dobrze a chwolili waszego Ojca, kiery je w niebie
17 Cobyście se nie myśleli, żech prziszoł bulać Prawo, lebo Proroków. Nie prziszoł żech bulać, ale zrobić wszecko, co było napisane
18 Prawiym wóm na isto: Pokiel niebo a ziymia sie nie skóńczóm, ani jedna litera, ani jedna piska nie bydzie wyciepano z prawa, aż sie to wszecko stanie
19 Gdoby złómoł choć jedno z tych nejmiyńszych przikozań a uczyłby tak ludzi, na tego sie bydzie prawić, że je nejmiyńszym we królestwie niebieskim. A gdoby robił wszecko podle tego przikozanio a uczyłby ludzi, na tego sie bydzie prawić, że je wielkucny we królestwie niebieskim.
20 Bo wóm prawiym: jesi waszo sprawiedliwość nie bydzie wiynkszo, jako wyuczónych w Piśmie a faryzeuszy, to żodnóm cestóm nie wleziecie do królestwa niebieskigo
22 Słyszeliście, że sie prawiło waszym prastarzikóm: Nie bydziesz zabijoł, a gdoby zabił tyn idzie pod sónd
23 Ale Jo wóm prawiym: każdy gdo je nasmolóny na swojigo brata yny tak, idzie pod sónd, a gdo rzeknie swojimu bratu: Raka, tyn idzie przed rade, a gdo rzeknie: Jeżeś przigupi bydzie mioł kore – ogiyń piekielny
24 Tóż, kiej prziniesiesz swój dar na ołtorz a tam se spómnisz, że twój brat mo cosik prociw tobie;
25 Niechej swój dar przed ołtorzym, idź a nejprzód sie ujednej sie ze swojim bratym a potym dziepro przidź a dej swój dar.
26 Ujednej sie z tym, gdo je prociw tobie wartko, pokiela żeś je pospołu s nim na ceście, coby cie nie udoł sóndzicielowi, a sóndziciela wachtorzowi a coby cie nie wciepali do harestu
27 Prawiym wóm na isto: nie wyndziesz tamstela, pokiela nie oddosz ostatnigo grejcara
28 Słyszeliście, że sie prawiło waszym prastarzikóm: Nie bydziesz lygoł do legiera s inkszóm babóm
29 Ale Jo wóm prawiym: Każdy gdo sie dziwo na babe, a chciołby jóm mieć, uż s nióm lygo do legiera we swojim sercu
30 Jak skyrs twojigo oka robisz grzych, to go raczy wycióng a hyń go od siebie. Bo lepszy je dlo ciebie, coby twoja jedna czynść skipła, niż coby całe ciało twoji było wciepane do ognia, co gore w piekle
31 a kiej skyrs twoji prawej packi robisz grzych, u-rznij jóm a hyń jóm od siebie. Bo lepszy je dlo ciebie coby twoja jedna czynść skipła, niż coby całe ciało twoji było wciepane do ognia, co gore w piekle
32 Prawiło sie aji tak: gdo chce odynść od swoji baby, to niech ji do pismo, że chce sie s nióm rozynść
33 Ale Jo wóm prawiym: Gdo chce odynść od swoji baby – chyba, że poszła do legiera s inkszym chłopym – tyn jóm kludzi do cudzego legiera a gdo sie s takóm babóm ożyni, tyn sóm siebie kludzi do cudzego legiera
34 Słyszeliście, że sie prawiło waszym prastarzikóm: nie bydziesz fałesznie przisiyngoł, ale dodzierżysz Pónbóczkowi tego, coś przisiyngoł
35 Ale Jo wóm prawiym, cobyście wubec nie przisiyngali – ani na niebo, bo niebo to je plac, kany Pónbóczek siedzi a regiruje
36 Ani na ziymie, bo óna je pod jego szłapami, ani na Jerozolime, bo to je miasto wielkucnego króla
37 Ani na swojóm głowe nie bydziesz przisiyngoł, bo nie poradzisz jednego włosa zrobić biołym, lebo czornym
38 Ale waszo rzecz niech bydzie: ja – ja, ni – ni a wszecko, co je wiyncyj, jako to, je od złego
39 Słyszeliście, że sie prawiło: oko za oko a zómb a zómb
40 Ale jo wóm prawiym: nie bydźcie prociw złymu, ale jak ci gdosik do facke w prawe lico, nadstow mu aji drugi
41 Tymu, gdo chce iść tobóm do sóndu skyrs jakisikej oblyczki, niechej aji mantel
42 A jak cie gdosik naganio, cobyś s nim dreptoł kilometer, to dreptej aji dwa
43 Tymu, gdo cie pyto, dej a od tego, gdo chce od ciebie pojczać sie nie obracej
44 Słyszeliście, że sie prawiło: bydziesz mioł fest rod swojigo przociela a na tego, kogo ni mosz rod bydziesz fest nasmolóny
45 Ale Jo wóm prawiym: miyjcie fest radzi tych, kierych żeście ni mieli radzi, tym kierzi szpatnie na was prawióm rzeknijcie, coby sie jim darziło, dobrze róbcie tym, kierzi was fest ni majóm radzi a rzykejcie za tych, kierzi wóm robióm źle a was sekirujóm
46 Cobyście byli synkami waszego Ojca, kiery je w niebie. Bo Ón robi tak, że jego słónko schodzi nad złymi a aji nad dobrymi a deszcz spuszczo aji na tych, co rzóndzóm prowde a tych, kierzi prowdy nie rzóndzóm
47 Bo jak mocie fest radzi tych, kierzi was majóm fest radzi, to jakóm mocie nagrode? Dyć przeca aji finance tak robióm.
48 Tóż bydźcie nejlepsi, jako poradzicie, bo takowny je Pónbóczek, kiery je w niebie
Gwara Śląska Cieszyńskiego
Trwa ładowanie...