Ludzie sie poradzóm powadzić pospołu, baji Starka ze Starzikiym, lebo gaździno z gazdóm. Ale mało gdo wiy, że na dziedzinie powadzić sie idzie aji ze zwierzyntami a z gowiydzióm, co sie jóm chowie we chlywie, w masztali a w szopce. Kupa razy było tak a eszcze dzisio tak je, że kury, trusiok, kaczyce, lebo krowy nie robióm ganc to a nie idóm tam, kany by chciała gaździnka. Tóż skyrs tego, gor baby sie z nimi wadzóm a jako, to se poczytelcie niży. Dycki to wyglóndo tak, jakby se gaździnka sama ze sobóm wyrzóndzała.
Kwuczka z maluczkimi kurczoczkami:
- Tóż kany ty podciepy podrepsiły.
- Terazy tukej były, oto na placu a uż kansik wlazły.
- Na pi, pi, pi, pi.
- Kaj ta mandora jich zaś zakludziła.
- Na Jezus Maryja, tu wszystko mo pieróna jedna a dycki jich kansik wysmyczy.
- Tukej żeś je, hósza, hósz do placu.
- Podziwej sie kaj idzie. Pierón jedyn zaś wloz do stodoły, dyć jich wszystki potraci.
- Takowne sóm szykowne, szkoda jich bydzie a óna jich kludzi po dziurach.
- Kaj idziesz? Mandoro oszkliwo, jutro bydziesz siedzieć we chlywie jo cie wyrychtujym!
- Tela człowiek kole tego chodzi a potym pierón zakludzi ty kurczoczki kansik do obilo a fertig.
Młode kurki, co nie chcóm iść wieczór siedzieć:
- Pi, pi, pi, pi. Pódźhawcie.
- Hósza, hósz, kaj uciekosz, idź ku chlywie.
- Kany tukej idziesz, podciepie jedyn.
- Tam pieknie ku chlywu, hósza.
- Na pieróno mało siedzieć, siedzieć.
- Taki sóm przeciwne ty kury, że jo nie wiym.
- Nie pójdzie to siedzieć za pieróna.
- Podziwej sie, tóż kaj tam lezie ku furtce.
- Drepsić do nocy, potym jich cosik zeżere a fertig.
- Yny uciekać, potym sie potracóm na miedzy a tela bydzie.
Krowa przi dojyniu:
- Malina na swe, pónknij sie kapke.
- Stój, bo mi wleziesz do ampra a tela bydzie.
- Chwostym sie pierón oganio a mi prosto do pysku.
- Stój, pieróno jedna, pod pyskiym mosz liści to żer.
- Tyn chwost ci ur-znym bydziesz widzieć, mandoro.
- Tela sie utropiym przi tymu dojyniu a yny oto pół ampra mlyka.
- Mało mlyka dowo a podciep je przeciwny jak pierón.
Przemykani baróna:
- Stój podciepie jedyn, jo cie yny chcym przymknóć.
- Tukej mosz takóm pieknóm trowke, bydziesz sie pos.
- Stój pierónie, bo szkubiesz tyn lańcuch, dyć mie posmykosz.
- Tako piekno trowka, nie bydzie sie pos yny wszystko szmatle a yny ryczeć.
- Kaj cióngniesz waryjocie, bydziesz widzioł, że cie zabijym na wórszt.
- Pierón oszkliwy, tak cióngnie dyć mi rynce wytargo a tela bydzie.
- Puszczym cie pierónie a idź ku dziedzinie, bydzie pokój.
- Tela sie człowiek musi naszkubać z podciepym barónym, jo nie wiym.
- Stój a poś sie, jutro bydziesz stoł aż wszystka trowa bydzie wygryziono, jo ci pokożym.
- Stój, eszcze mi buchnie do rzici, złómiym klepeto a bydzie kóniec.
Gwara Śląska Cieszyńskiego
Trwa ładowanie...