Jako sie robi wajco?
Dycki, kiej sie dziwóm na kure, to hneda myślym ni o miynsie, co bych go móg wciść na obiod, ale o wajcu. Jo eszcze je z tej generacyji, co óna wiy skiyl sie wajco biere, ale spytejcie sie oto takich dziecek, lebo synków, dziołuch co jim je oto patnost - skiyl sóm wajca, to Wóm możne rzeknóm, że hanej z tej wielkucnej hali, kany bywo aji pore tysiyncy kur. Tóż dobre, ale wajco nie robi żodno maszyna, ani nie dowajóm kure na żodnóm lałfryke, jako we werku. To je jedno, esi kura bywo na gospodarce, lebo we wielkucnej hali - óna musi siednónć do gniozda a mieć pokój, coby mógła wysrać wajco. Ponikierzi prawióm, że kura nosi wajca, ale każ tam. Jak se spóminocie ze szkoły a nie klamaliżeście na biologiji - kura ze zadku mo yny jednóm dziure a przez nióm wyciepuje wszecko ze siebie, aji wajco. Tóż, kiej gdosik rzeknie, że kura wysrała wajco, to prawi prowde, bo wajco wylazuje z tej dziury, co nióm kura aji sro. Nie piszym tego, coby gdosik jutro przestoł jeść wajca, ale skyrs tego, coby gor młodzi wiedzieli, skiyl sie biere jodło. Do dzisia sie eszcze prawi, że kura wysrała wajco a ni w tym nic szpatnego, bo óna ma yny jednóm dziure ze zadku a za to ni może - darmo tak jóm Pónbóczek stworził a fertig. Starzi ludzie mianowali wiecy tak, jako óny sóm na isto. Gaździno wiela razy potrzebowała wartko jedno wajco, bo ji chybiało do nugli a widziała, że kura siedzi na gnioździe tóż poczkała. Naroz kura sie dźwigła a pult, uż wajuszko było na słómie. Gdo widzioł, jako kura robi wajco, tyn jóm bydzie mioł w zocy, bo óna boroka sie fest utropi. Stareczka prawili, że kiej wajco je wielkucne, to może aji kurze rzić roztargać a to ni ma żodno sranda, ani nic do śmiychu. Człowiekowi też może rzić roztargać, gor kiej e pojy fazoli s kiszkóm, ale to je ganc inkszo historyja. Kura, coby zrobić wajuszko, musi na niego nazbiyrać. Musi zeżrać za cały dziyń obilo, chroboków, glistów, maluczkich kamiyni, szupów z wajec a kaj yny co, coby w postrzodku sie zrobiło wajco. Kiej uż kura czuje, że wajco jóm ciśnie na rzić, to s nim idzie - tak prawili Starka - yny musi nónść gniozdo, kany go wysro. A to ni ma tak Rostomili, że oto narychtujecie kisiynki, wrazicie do nich słóme a bydziecie czakać aż w nich bydóm wajca. Kura idzie s wajcym tam, kany óna chce. Może to wajco wysrać w kisiynce, ale dziepro za jakisik czas, bo nejlepszy sie robi wajca oto na miechu s obilym, w sómsieku a aji w lysce. Zrobić wajco, to je fest procno robota dlo każdej kury, tóż kiej uż go kupicie w kónzumie, to go pyty miyjcie w zocy, bo kura co go robiła zbiyrała na niego isto cały dziyń a potym go musiała eszcze ze siebie wyciść - jedni prawióm, że go wysrała, inksi że go zniósła - to uż je ganc jedno. Nejważniejsze je to, że Wóm szmakuje a to skyrs tego, że gaździno kuróm dowała obili, kukurzice, zbytki z obiadu, z jodła a że s nimi rzóndziła, bo z kurami trzeja przerzóndzić. Kiej gaździno rzeknie kurce: "kurko, pyty zrób mi jutro do połednia wajuszko", to kura ji rzeknie: "kooo, koo, ko, koooo" a to znaczy w kurskij rzeczy, że na isto to wajco jutro bydzie...
Gwara Śląska Cieszyńskiego
Trwa ładowanie...