1 Wachujcie siebie samych, cobyście waszej jałmużny nie dowali przed ludziami skyrs tego, coby sie na was dziwali, inakszy nie bydziecie mieć nagrody u naszego Ojca, kiery je w niebie
2 Skyrs tego, kiej dowosz jałmużnym, to nie trómb przed sobóm, jako to robióm fałeszni ludzie w tymplach a na hólicach, coby jich ludzie chwolili. Prawiym wóm na isto: Bieróm swojóm nagrode.
3 Ale ty, kiej dowosz jałmużnym, niech nie wiy twoja lewo packa, co robi prawo
4 Coby twoja jałmużna była fórt schowano, a twój Ojciec, kiery widzi to co je chowane, tyn ci oddo a bydzie to widać.
5 A kiej rzykosz, to nie bydź jako fałeszni ludzie. Bo óni radzi rzykajóm a przi tymu stojóm w tymplach a na kraju hólic, coby jich inksi ludzie widzieli. Prawiym wóm na isto: bieróm swojóm nagrode.
6 Ale ty, kiej rzykosz, wlyź do swoji izby, zawrzij dwiyrze a rzykej do swojigo Ojca, kiery je schowany a twój Ojciec, kiery widzi to, co je schowane tyn ci oddo a bydzie to widać.
7 A kiej rzykocie, to nie fulejcie jako pogany; bo óni se myślóm, że skyrs tego że bydóm kupa faflać to jich gdosik bydzie posłuchoł.
8 Nie bydźcie, jako oni, bo przeca wasz Ojciec wiy, co wóm trzeba, niż go eszcze bydziecie pytać
9 Tóż wy tak rzykejcie: Ojczy nasz, kiery żeś je w niebie, niech bydzie świynte Twoji miano.
10 Niech przidzie Twoji królestwo, niech sie robi wszecko, jako Ty chcesz na ziymi a aji w niebie
11 Dej nóm dzisio naszego chleba, co go mómy na każdo
12 A przebocz nóm nasze winy, jako aji my przeboczómy tym, co nóm ubliżyli.
13 A nie wystowiej nas na pokuszyni, ale nas zbow ode złego, bo Twoji je królestwo, moc a chwała uż dycki. Amyn.
14 Bo kiej przeboczycie ludzióm to, co zrobili szpatnie, to aji wóm przeboczy wasz Ojciec niebieski
15 Ale, kiej nie przeboczycie ludzióm to, co zrobili szpatnie, to aji wasz Ojciec nie przeboczy wóm tego, coście szpatnie zrobili.
16 A kiej pościcie, to niech waszo gymba nie bydzie okorano, tak jak jóm majóm fałeszni ludzie; óni se robióm szpatne gymby, coby ludzie widzieli, że poszczóm. Na isto wóm prawiym: bieróm swojóm nagrode.
17 Ale kiej ty pościsz, namazej se głowe a opucuj gymbe.
18 Coby ludzie nie widzieli, że pościsz, ale twój Ojciec, kiery je schowany; a twój Ojciec, kiery widzi to co je schowane tyn ci oddo a bydzie to widać.
19 Nie skludzejcie e skarbów na ziymi, kaj jich zeżeróm mole a zar-zowióm a kany złodzieje wlazujóm do chałup a mogóm jich buchnónć.
20 Ale skludzejcie se skarby w niebie, kany ani mole jich nie zeżeróm, ani nie zar-zowióm a kany złodzieje nie wlazujóm do chałup a nic nie buchnóm.
21 Bo kaj je wasz skarb, tam bydzie aji wasze serce.
22 Światło ciała to je oko. Tóż kiej twoji oko je szczyre, to całe twoji ciało bydzie pełne światła.
23 Ale kiej twoji oko je złe, to całe twoji ciało bydzie pełne ćmoka. Tóż kiej światło co je w postrzodku ciebie, je jako ćmok, to jaki bydzie sóm ćmok?
24 Żodyn ni może słógować dwóm panóm, bo abo jednego nie bydzie mioł rod a drugigo bydzie miłowoł, abo jednego sie bydzie dzierżoł a na drugigo ie ani nie podziwo. Ni możecie słógować Pónbóczkowi a mamónie.
25 Skyrs tego wóm prawiym: nie starejcie sie o wasze żywobyci, co bydziecie jeść, abo co bydziecie pić, ani o wasze ciało, w co ie bydziecie oblykać. Dyć przeca żywot ni ma czymsik wiyncyj jako jodło a ciało czymsik wiyncyj jako oblyczki, no ni?
26 Podziwejcie ie na ptoki na niebie, że ani nie siejóm ani nie sieczóm obilo, ani nic nie skludzajóm do sypanio a jednako wasz Ojciec niebieski ich kormi. A czy wyście nie sóm wiyncyj zocni jako óny?
27 A gdo z was, kiej sie staro może prziczynić łokieć do tego, wiela mierzi?
28 A czymu sie starocie o oblyczki? Podziwejcie sie na lilije na miedzy, jako rosnóm: nie robióm ani nie przóndóm.
29 A prawiym wóm, że ani Salómón we swoji calućki szumnocie nie był tak obleczóny, jako jedna z nich
30 Tóż kiej trowe, co rośnie na miedzy, co óna dzisio je a jutro sie jóm wyciepuje do kachloka, Pónbóczek tak oblyko, to przeca o wiela barży was oblecze, ludzie kierzi mocie małóm wiare?
31 Tóż nie starejcie sie a nie rzóndźcie: co bydymy jeść? lebo: co bydymy pić? abo: co se na siebie obleczymy?
32 Bo o to wszecko sie starajóm pogany. Wasz Ojciec niebieski wiy, że tego wszystkigo potrzebujecie.
33 Ale chledejcie nejprzód królestwa Pónbóczkowego a jego sprawiedliwości, a to wszecko dostaniecie.
34 Skyrs tego nie starejcie sie o dziyń, co bydzie jutro, bo jutro sie bydzie starać samo o siebie. Dziyń mo dość swoji utropy.
Gwara Śląska Cieszyńskiego
Trwa ładowanie...