Serwus, mianuja sie Grzegorz, a znocie mie z tego, że ôd lot sznupia we ślōnskij godce i prōbuja ja poskłodać w cosik takigo barzij do modych.
To, z czego mie nojbarzij wierza znocie, to przekłady literatury na nasze, tōż na zicher żeście słyszeli (a jeszcze lepij czytali) ô „Godnij Pieśni”, „Drachu”, „Małym Princu”, „Niedźwiodku Puchu” abo „Alicyji we Kraju Dziwōw” po ślōnsku.
Ôkrōm tego robia ale tyż take rzeczy, co majōm być dostympne do wszyskich. Nasz jynzyk je słaby, tōż coroz mynij ludzi go używo i bez to jak ludzie niy przichodzōm do godki, to godka musi przijś do ludzi.
Beztōż kludza (fest niyregularnie) program „Chwila z godkōm” na youtubowym kanale, co mo take samo miano.
|
|
|
Ważniyjszo ale podle mie je platforma Silling, co na nij znojdziecie:
Translatōr
Pora ślōnsko-polsko i polsko-ślōnsko poznowo bez 22 300 słōw bazowych, co dowo kole 70-80 procynt pokrycio tekstu. Dalszo robota nad niōm bydzie wymogać dodanio dalszych 7 tys. por słōw i ulepszynio noczynio anotacyje słōw.
Korpus Ślōnskij Mowy
Korpus Ślōnskij Mowy we wolnym dostympie online mo 1 102 837 słōw. Ta liczba może jeszcze rōś, bo durch znojdujōm sie nowe teksty, co je idzie przidać do korpusu.
SileSłownik
SileSłownik to piyrszy internetowy słownik ślōnskigo jynzyka ôparty na zdrzōdłach. Mo 25340 haseł i je podzielōny na dwie tajle: Słownik minimum i Przidowek.
We Słowniku minimum we kożdym haśle idzie znojś informacyje ô znaczyniach danego słowa, przikłady użycio we literaturze i wiadōmości ô tym, jak nojlepij danego słowa używać.
Hasła we przidowku sōm uproszczōne. Podowajōm skrōcōno ôdmiana i ôdpowiedniki we polskim jynzyku. Na kōńcu majōm sie rozwinōńć do takij samyj formy jak te ze słownika minimum.
Programy
Na strōnie znojdziecie tyż katalog programōw po naszymu. Z wiynksza ône były przełożōne na godka bez sōm Silling. Dziynki tyj platformie idzie mieć cołki kōmputer po naszymu, bo Ubuntu (ôperacyjny systym), LibreOffice (paket do biōra) i Firefox (przeglōndarka necu) sōm już dostympne po ślōnsku.
Bibliotyka
Jedna z nojważniyjszych rzeczy przi nauce jynzyka to ôczytać sie w nim. Bez to na Sillingu je zbiōr ksiōnżek po naszymu we formatach pdf, epub, mobi, txt, abo do czytanio zaroz na strōnie.
We sumie patrōni sfinancowali do dzisiej:
- translatōr na bez 22 tys. słōw,
- korpus na bez 1,1 mln słōw,
- słownik na bez 25 tys. słōw,
- ôziym ksiōnżek,
- siedymnoście programōw
- trzidziści jedyn ôdcinków „Chwile z gŏdkōm”.
Piyknie dziynkuja i to je durch niy kōniec!
Najnowsi Patroni
